Астанада Қазақстан-Қытай AI мектебі ашылуы мүмкін

Бұл ұсыныс Мемлекет басшысының Республикалық тамыз конференциясының пленарлық отырысында жасаған баяндамасында айтылды. Президент білім беру жүйесінің барлық деңгейі өзара байланысты болуы керектігін атап өтті.
Тоқаевтың пікірінше, жасанды интеллектіні дамыту тек жоғары білім беру ұйымдарының міндеті болмауы тиіс. Балалардың жаңа технологияларға ерте жастан бейімделуі болашақта елдің адами капиталы мен технологиялық әлеуетін күшейтуге мүмкіндік береді.
Президент Қазақстанда қыркүйек айында Жасанды интеллект университеті ашылатынын да айтты. Дегенмен ол бұл қадамды жеткіліксіз деп санайды. Сондықтан Үкіметке Қытайдың технологиялық даму тәжірибесін ескере отырып, Астанада екі елдің бірлескен жасанды интеллект мектебін құру мүмкіндігін қарастыруды тапсырды.
Бұл бастама кездейсоқ ұсынылып отырған жоқ. Қазақстанда 2026 жыл Цифрландыру және жасанды интеллект жылы ретінде жарияланып, білім беру саласына жаңа технологияларды енгізуге басымдық беріліп келеді. Мемлекет басшысы мамыр айында орта білім беру жүйесіне жасанды интеллектіні енгізу жөніндегі арнайы шараларды бекіткен. Құжатта өңірлерге жасанды интеллектіні білім беру процесіне енгізу бойынша жоспарлар әзірлеу міндеті жүктелген.
Астанада бұл бағытта қазірдің өзінде бірқатар жоба жүзеге асырылып жатыр. Қалалық тамыз конференциясында педагогтер жасанды интеллектіні оқытуда пайдалану, цифрлық құралдарды енгізу және мұғалімдердің жаңа технологиялармен жұмыс істеу дағдыларын жетілдіру мәселелерін талқылады.
Президент ұсынған Қазақстан-Қытай мектебі осы жұмыстың келесі кезеңіне айналуы мүмкін. Оның нақты бағдарламасы, оқыту моделі және іске асыру тетіктері Үкіметтің талдауынан кейін белгілі болады.
Мемлекет басшысының бастамасы Қазақстанда жасанды интеллект бойынша білім беруді мектептен бастап университетке дейін біртұтас жүйеге келтіру мақсатын көздейді. Мұндай тәсіл технология саласында білікті кадрлар даярлауға және елдің цифрлық экономикадағы орнын күшейтуге бағытталған