Ауыл шаруашылығында дағдарыс: ҚР-да тыңайтқыш өндірісі құлдырауда

Бірақ экспорт екі еседен артық көбейді, деп хабарлайды Turkistan Today.

Минералды немесе химиялық тыңайтқыштар өндірісі айтарлықтай азайды. Мәселен, биыл қаңтар–маусымда азот тыңайтқыштар өндірісі 192,6 мың тонна болды, бұл былтырғы сәйкес кезеңмен салыстырғанда 10,4% аз. Фосфор тыңайтқыштар өндірісі небәрі 7,6 мың тоннаны құрады, бұл 2022 жылғы қаңтар–маусыммен салыстырғанда бірден 14,1 есе аз.

Бұл ретте минералды және химиялық тыңайтқыштар экспорты 2,5 есе өсіп, биыл қаңтар–мамырда 264,4 мың тоннаға жетті, оның 184,1 мың тоннасы ТМД елдеріне, 80,2 мың тоннасы басқа елдерге экспортталды.

Жалпы, экспорт көлемінің жартысынан сәл астамы Өзбекстанға жөнелтілді: 137,7 мың тонна, былтырғымен салыстырғанда 3,3 есе өскен. Одан кейін Польша (47 мың тонна), Ресей (38,7 мың тонна) және Литва (20,3 мың тонна). Сондай-ақ айтарлықтай көлем Тәжікстан (6,3 мың тонна) мен Түркияға (6 мың тонна) жіберілді.

Биыл мамырдың қорытындысы бойынша, ЕАЭО елдеріне тыңайтқыштардың экспорттық бағасы 2,7% төмендеді, бір жыл бұрын 24,9% өскен еді. Барлық басқа елдер бойынша экспорттық баға 6,2% төмендеді, былтыр 56,3% өскен.