Депутат: “Түркістан облысын ауыз сумен қамтамасыз етуіміз керек”

Мәжіліс депутаты Ұласбек Сәдібеков Түркістан облысындағы елді мекенді ауыз сумен қамтамасыз ету мәселесін көтерді,- деп хабарлайды turkistan.today.

“Түркістан облысы Сайрам ауданына қарасты Қарабала ауылы еліміздегі ең үлкен ауылдық округтің бірі. Қазіргі таңда 60-мыңнан астам тұрғыны бар”,- деді депутат.

Айтуынша бұл ауылда мыңнан астам кәсіпорын жұмыс істейді екен.

“Сондай-ақ Қарабала ауылы елімізді етпен қамтамасыз етеді. Мұнда жылына 36 мың тонна ет ел аумағындағы сауда орындарына жіберілсе, 3 мың тоннадан аса ет экспортталады. Ауылдың инфрақұрылымы жылдан-жылға жаңарып келеді. Дегенмен, ауыл тұрғындарын таза ауыз суымен қамтамасыз ету мәселесі әлі күнге дейін шешімін таппай келеді. Бұл мәселеге қатысты жобалық сметалық құжаттар да дайын. Мемлекеттік сараптамадан да өткізілген. Ендігі жерде жобаға сәйкес жұмысты атқару үшін қазынадан 9 млрд 300 млн теңге қаражат қажет. Оған жергілікті бюджеттің шамасы жетпейді. Сондықтан ауыл халқы бар үмітін Астанадан күтіп отыр”,- деді Мәжіліс депутаты.