Қарағандыда Бөкетов есімі ұлықталды

Аталған рәсім — академик Е. А. Бөкетовтің 100 жылдық мерейтойы аясында ұйымдастырылған маңызды бастамалардың бірі ретінде өткізілді. Бұл құжат қос тараптың ғылым, білім және мәдениет салаларындағы байланысын нығайтуды мақсат тұтқан елеулі қадам ретінде бағаланды.

Салтанатты жиында университеттің Басқарма Төрағасы – Ректоры Нұрлан Орынбасарұлы Дулатбеков құттықтау сөз сөйлеп, жаңа серіктестіктің бірлескен ғылыми жобалар, білім беру бастамалары және мәдени бағдарламалар жүзеге асыруда мол мүмкіндіктер ашатынын атап өтті.

Шараның символдық мәні де айрықша — Қарағанды облыстық тарихи-өлкетану музейінің директоры Ержан Нұрланұлы Нұрмағамбетов – аталмыш университеттің түлегі. Оның туған оқу ордасына серіктес ретінде оралуы – университет пен оның түлектері арасындағы рухани сабақтастықтың жарқын көрінісі ретінде қабылданды.

Университет тарихы музейінің директоры Қарлығаш Айтбайқызы Тұрсынбаева өз сөзінде университет жанындағы музейлердің тарихи жады мен ғылыми мәдениетті қалыптастырудағы маңызды рөліне тоқталды. Ол музейлердің тек жәдігерлер сақтайтын орын ғана емес, өткен мен бүгінді байланыстыратын интеллектуалдық әрі құндылықтық кеңістік екеніне назар аударды.

Сөз соңында тарих ғылымдарының кандидаты, доцент Салават Қамшыбайұлы Кентбек меморандумның гуманитарлық білім беру кеңістігіндегі рөліне тоқталып, университетті – интеллектуалдық алаң, музейді – ұлт жадысының сақтаушысы ретінде сипаттады. Оның айтуынша, осындай серіктестік қоғам мен уақыт арасындағы диалог орнатуға, ұрпақтар сабақтастығын терең ұғынуға мүмкіндік береді.