Қазақстан мен Оңтүстік Корея сирек металдар орталығын құру жөнінде келісімге келді

27 тамыз күні Сәтбаев университетінің Металлургия және байыту институты мен Кореяның өнеркәсіптік технологиялар институты (Korea Institute of Industrial Technology) арасында ғылым және технология саласындағы ынтымақтастық туралы меморандумға қол қойылды,- деп хабарлайды turkistan.today

Бұл меморандум - ресми келісім ғана емес, өзара білім алмасуға, ресурстар мен тәжірибе алмасуға деген шынайы ұмтылыс. Серіктестіктің негізгі мақсаты – Қазақстанда жоғары температура/ реакцияларға қабілетті сирек металдар мен жоғары сапалы өнеркәсіп өнімдерін өндіру технологияларының ғылыми орталығын (Center for High-Temperature/Reactive Rare Metal Materials and High-Quality Industrial Products Technology) құру. Орталық екі елдің дамуы мен өркендеуіне септігін тигізетін озық тәжірибелер мен технологияларды әзірлейтін орынға айналады.

Бұл ірі жобаның ең басты бағыты – сирек металдарды корейлік материалдар мен бөлшектерді өндіру технологияларымен үйлестіре отырып, қазақстандық әзірлемелерді коммерцияландыру. Жоба бес жылға жоспарланып отыр, ал оның бюджеті 10 миллион доллардан асады. ҚР Ғылым және жоғары білім министрі Саясат Нұрбек бұл жобаны қадағалап,оны жүзеге асыруда қолдау көрсететінін айтты. 

Ынтымақтастық қарым-қатынас негізгі бағыттарды қамтитын болады, атап айтқанда, ғылыми орталық құру жоспарларын әзірлеу және оны жүзеге асыру, орталықтың тиімді жұмыс істеуі үшін қажетті инновациялық технологиялар мен зерттеулерді дамыту. Меморандум ғылыми ынтымақтастық аясын айтарлықтай кеңейтіп, ғалымдармен өзара алмасуды, ғылыми семинарлар мен шеберлік сабақтарын өткізуді де көздейді. Негізгі мақсат – соңғы нәтижеде жоғары технологиялық өнім алу және оны коммерцияландыру.