ОСК шешімі: «Байтақ» партиясы сайлау бәсекесіне қосылды

Оның жұмысына «Қазақстанның «Байтақ» жасылдар партиясы» қоғамдық бірлестігінің басшылығы, ЕҚЫҰ ДИАҚБ халықаралық байқаушылары, Бас прокуратураның, Қаржы, ішкі істер және әділет министрліктерінің, сондай-ақ бұқаралық ақпарат құралдарының өкілдері қатысты. Сонымен қатар, бейнеконференциялық байланыс арқылы елорда, облыстар және республикалық маңызы бар қалалардың аумақтық сайлау комиссияларының төрағалары мен мүшелері қосылды.

Күн тәртібіне сәйкес 2026 жылғы 23 тамызға тағайындалған Қазақстан Республикасы Құрылтайының депутаттарын сайлауға «Қазақстанның «Байтақ» жасылдар партиясы» қоғамдық бірлестігінің партиялық тізімін тіркеу мәселесі қаралды.

Баяндама жасаған ОСК мүшесі Азамат Айманакумов партияның Орталық сайлау комиссиясына ұсынған құжаттарының тізбесі және кандидаттарды тексеру жөнінде комиссия жүргізген жұмыстар туралы ақпарат берді.

«Қазақстанның «Байтақ» жасылдар партиясы» қоғамдық бірлестігі 47 адамнан тұратын партиялық тізімді ұсынды. Қазақстан Республикасы Орталық сайлау комиссиясының уәкілетті мемлекеттік органдарға жолдаған сұрауларына сәйкес, Құрылтай депутаттығына кандидаттардың Конституция мен «Қазақстан Республикасындағы сайлау туралы» Конституциялық заң талаптарына сәйкестігі тексерілді. Партиялық тізімде әйелдер, жастар және мүгедектігі бар адамдар санатынан 18 кандидат бар, бұл жалпы тізімнің 38,3%-ын құрайды. Заңда белгіленген квота сақталған. Партиялық тізімге енгізілген барлық тұлғалар Конституция мен «Қазақстан Республикасындағы сайлау туралы» Конституциялық заң талаптарына сәйкес келеді», - деп атап өтті Азамат Айманакумов.