Инклюзивті типография, арт-кафе және ұлттық өнім өндірісі — Қарағанды облысының жастары «Тәуелсіздік ұрпақтары» гранттары арқылы әлеуметтік маңызы зор жобаларды жүзеге асыруда.
Қарағанды облысының белсенді жастары «Тәуелсіздік ұрпақтары» мемлекеттік грантының қолдауымен инклюзивті әрі әлеуметтік бағыттағы бастамаларын іске асырып жатыр. Бағдарлама жас кәсіпкерлер мен шығармашыл азаматтарға өз идеяларын жүзеге асыруға нақты мүмкіндік ұсынып, өңірдің әлеуметтік-экономикалық дамуына серпін беруді көздейді.
Солардың бірі — Айна Аратаеваның инклюзивті типография жобасы. Бұл бастама коммерциялық қызмет пен әлеуметтік жауапкершілікті ұштастырып, менталдық ерекшеліктері бар адамдарды еңбекке тартуға бағытталған. Типографияда мүмкіндігі шектеулі жандар үшін арнайы жұмыс орындары ашылып, олар қарапайым баспа процестерінен бастап дизайн және беттеу жұмыстарына дейін түрлі дағдыларды меңгере алады.
— Менталдық бұзылыстары бар адамдар мектептен кейін еңбек нарығынан тыс қалып жатады. Ал типография саласы әртүрлі қабілет деңгейіне бейімделе алады. Бұл — жай ғана бейімдеу емес, нақты нәтиже беретін, табыс әкелетін жұмыс, — дейді жоба авторы.
2025 жылы гранттық конкурсқа алты бағыт бойынша — бизнес, волонтерлік, IT, мәдениет, медиа және ғылым салаларында барлығы 264 жоба ұсынылған. Көпсатылы іріктеу нәтижесінде 25 жоба жеңімпаз атанып, әрқайсысына 2 миллион теңгеден қаржылай қолдау көрсетілді.
Жеңімпаздардың қатарында Әсем Бекбаева да бар. Ол мүмкіндігі шектеулі жасөспірімдер мен ересектерге бариста кәсібін және кофеграфика секілді шығармашылық бағыттарды үйрететін инклюзивті арт-кафе ашуды жоспарлап отыр. Жоба қатысушылардың әлеуметтік бейімделуіне және қоғамда толерантты көзқарас қалыптастыруға бағытталған.
— Бұл кеңістікте адамдар тек кәсіп меңгеріп қана қоймай, өзара араласып, өзін қоғамның маңызды мүшесі ретінде сезіне алады. Кофеграфика сабақтары шығармашылық форматта өтеді, — дейді Әсем.
Грант қаржысы тек жаңа іс бастауға емес, қолданыстағы бизнесті кеңейтуге де мүмкіндік береді. Мәселен, Жазира Төлегенова «Qazaq National Product» бренді аясында ұлттық тағам — құрт өндірісін жаңғыртуды қолға алмақ.
Қазіргі таңда кәсіпкер құрттың бірнеше түрін — классикалық, ысталған, сарымсақ қосылған және дәмдеуіштермен дайындалған өнімдерді шығарады. Өнім әртүрлі пішінде ұсынылады. Алынған грант өндіріс көлемін арттырып, жаңа жабдықтар сатып алуға және қосымша жұмыс орындарын ашуға жол ашады.
Жобалардың барлығы салалық құрылымдардың сүйемелдеуімен жүзеге асырылып, алдағы айларда іске қосылады.
Астана, Ш.Қалдаяков көш, 23/1, 26 кеңсе
info@turkistan.today
ҚР Ақпарат және коммуникациялар министрлігінің 22.08.2018 жылдан №17251 «Turkistan Today» АА Куәлігі берілген. © 2018-2024
Сайттағы материалдарды пайдаланғанда міндетті түрде сілтеме берулеріңізді сұраймыз. Ақпараттық порталдағы авторлық және басқа да құқықтар толығымен қорғалатынын ескертеміз. Автордың жеке пікірі редакцияның көзқарасы болып саналмайды. Жарнама мен түрлі хабарландыруларға жарнама беруші жауапты.
© Turkistan Today. Барлық құқық қорғалған.
