Үкіметте экономикадан бастап балалар қауіпсіздігіне дейінгі негізгі міндеттер талқыланды

Күн тәртібіндегі басты мәселелердің бірі орта мерзімді кезеңге арналған экономикалық көрсеткіштер мен бюджет параметрлерін айқындауға арналды. Үкімет бұл құжаттар арқылы мемлекеттік қаржының негізгі бағыттарын белгілеп, алдағы жылдарға жоспарланған әлеуметтік және инфрақұрылымдық жобаларды жүзеге асырудың қаржылық негізін қалыптастыруды көздеп отыр.
Бюджет саясаты әлеуметтік маңызы бар нысандарды дамыту мәселесімен де тығыз байланысты. Бұған дейін Мемлекет басшысы Қасым-Жомарт Тоқаевтың қатысуымен өткен кеңесте ауруханалар, балаларды оңалту орталықтары, мәдениет және спорт нысандары сияқты объектілердің құрылысын жеделдету қажеттігі айтылған болатын.
Үкімет мүшелері энергетикалық жүйенің алдағы қысқы кезеңге дайындығын да қарастырды. Ресми дерекке сәйкес, 2025–2026 жылдардағы жылыту маусымы ірі технологиялық апаттарсыз өтіп, тұтынушылар жылу және электр энергиясымен тұрақты қамтылған. Бұл ретте энергетикалық инфрақұрылымды жаңғыртуға бағытталған жұмыстар жалғасып келеді.
Өткен жылы электр станцияларындағы жөндеу жұмыстарына 348 млрд теңге жұмсалса, жылу желілерін жаңартуға 129 млрд теңге қарастырылған. Қаржыландыру нәтижесінде бірқатар жылу электр орталығының техникалық жағдайын жақсартуға мүмкіндік туған.
Отырыста жаңа оқу жылына дайындық мәселесіне де айрықша көңіл бөлінді. Білім беру жүйесінде цифрлық технологияларды кеңінен қолданумен қатар, оқушылардың құқықтық сауаттылығы мен жеке қауіпсіздігіне қатысты білімін күшейту жоспарланып отыр.
Атап айтқанда, мектеп бағдарламасына жасанды интеллект бағытындағы өзгерістер енгізілмек. «Цифрлық сауаттылық» және «Информатика» пәндерінің мазмұны жаңартылып, бірқатар жаңа оқу курстары енгізіледі. 5–7 сыныптарға «Конституция негіздері», ал 8–11 сыныптарға «Заң және тәртіп» курсын оқыту көзделген. Бұдан бөлек, 5–11 сынып оқушылары үшін «Жеке қауіпсіздік» курсы міндетті болады.
Жоғары білім беру саласында да мемлекеттік гранттарға қатысты жұмыстар жүргізілуде. Биыл грант конкурсына шамамен 127 мың талапкер қатысқан. Нәтижесінде бөлінген гранттардың 98 пайызы игерілген. Мемлекеттік қолдаумен қатар, жергілікті атқарушы органдар, жоғары оқу орындары мен түрлі қорлар тарапынан қосымша білім гранттары ұсынылған.
Балалардың денсаулығы да Үкімет назарындағы маңызды бағыттардың бірі болды. Жыл басынан бері 2,3 млн бала профилактикалық медициналық тексеруден өткен. Сонымен қатар мектептердегі медициналық пункттердің мүмкіндігін кеңейту мақсатында цифрлық диагностикалық құрылғыларды қолдану қолға алынған.
Цифрлық инфрақұрылымды дамыту бойынша да нақты мақсаттар белгіленді. Қазіргі уақытта еліміздегі мектептердің 92 пайызы жоғары жылдамдықты интернетпен қамтылған. Үкімет бұл көрсеткішті 2027 жылға қарай толық 100 пайызға жеткізуді жоспарлап отыр.