Мереке алдында азық-түлік бағасын тұрақтандыру – Сауда министрлігінің басты міндеті

26 қараша күні өткен кездесуге еліміздегі 80 ірі сауда желісінің басшылығы мен өңірлерден келген өкілдер қатысты. Басқосуда жаңа жыл алдында жиі байқалатын сұраныстың өсуі кезінде нарықтағы баға теңгерімін сақтау жолдары қарастырылды.

Министр Арман Шаққалиев азаматтардың өмір сапасын қамтамасыз ету мен ішкі нарықтың тұрақты жұмысын қолдау үшін азық-түлік бағасының тұрақтылығы маңызды екенін атап өтті. Осы мақсатта тауарларды ел ішіне жедел жеткізуге мүмкіндік беретін «жасыл дәліз» механизмі іске қосылған. Бұған қоса, өнім қорын дер кезінде толықтыруға бағытталған мемлекеттік қолдау шаралары да жұмыс істейді.

Кеңесте алдағы мереке қарсаңында «Береке Fest» акциясының жаңа кезеңін өткізу жоспарланғаны жарияланды. Бұған дейінгі кезеңдер әлеуметтік маңызы бар тауарлардың қолжетімділігін арттыруға және олардың бағасын төмендетуге сеп болған. Жаңа кезеңнің мақсаты – нарықта баға тұрақтылығын одан әрі қамтамасыз ету және тұтынушылар үшін жайлы жағдай қалыптастыру.

Сауда желілері аталмыш бастамаға белсенді қатысуға әзір екенін айтып, тауар қолжетімділігі мен қызмет көрсету сапасын жақсартуда министрлікпен бірлесе жұмыс істеуге дайын екендерін жеткізді.

Өңірлік атқарушы органдар да ауыл шаруашылығы жәрмеңкелерін жалғастыруды көздеп отыр. Мұндай жәрмеңкелерде өнімдер төмендетілген бағамен ұсынылып, тұрғындарға қосымша таңдау мүмкіндігін береді және нарық тұрақтылығын қамтамасыз етуге ықпал етеді.

Сауда және интеграция министрлігі кәсіпкерлерді серіктестікті нығайтып, маусымдық акцияларға қатысуға және мерекелік кезеңде әлеуметтік маңызы бар тауарлардың қолжетімділігін қамтамасыз етуге шақырды.