Түркістан: Жетісайда “Жайлы мектеп” жобасы аясында 900 орындық мектеп ашылды

Бұл жоба – білім беру сапасын арттыру мен оқушыларға барынша ыңғайлы жағдай жасау үшін жасалған маңызды қадам. Осыған орай, 2024-2025 жылдары Түркістан облысында 29 мектеп салу көзделген. 

Аталмыш жоба аясында Жетісай ауданының Асықата кентінде қолданысқа берілген кезекті 900 орындық білім ұясының ашылу салтанатына Түркістан облысы әкімінің орынбасары Бейсенбай Тәжібаев арнайы қатысып, жаңа мектептің ашылуымен жұртшылықты құттықтады.

– Өңірімізде 29 жайлы мектеп құрылысынан басқа облыстық бюджет және басқа қаржы көздерінен 21 мектеп салынуда. Бұл 50 мектеп пайдалануға берілгенде өңірде апатты және үш ауысымды мектептер мәселесі шешіледі. Өздеріңізге белгілі, облысымызда білім саласына ерекше көңіл бөлініп отыр. Біз оқу-тәрбие жұмыстарына қолайлы жағдай жасау мақсатында барлық қажетті шараларды қабылдап жатырмыз. Білім ошақтарының аумағы мен ғимарат ішінде оқушылардың қауіпсіздігін толықтай қамтамасыз етеміз. Ол үшін биылғы жылдың өзінде мектептеріміз бейнебақылау, дабыл, FАCЕ ID жүйелерімен қамтылып, полицияның жедел басқару орталығымен интеграцияланды, – деді Бейсенбай Дәулетұлы. 

Мектептің жалпы аумағы – 3 га. 50 сынып комплектісі мен 255 орындық асханасы, кітапхана мен арнайы оқу залы, шеберхана мен акт залы, медициналық пункт бар. Бейнебақылау камералары орнатылған.

Заманауи пәндік кабинеттермен, оның ішінде робототехника, кең жолақты интернет, жаңа модификацияланған кабинеттермен жабдықталған мектепте оқушылардың сапалы білім алуларына толық жағдай жасалған.