Түркістанда "Оңтүстік Қазақстан" газетінің 100 жылдығына орай фотокөрме өтті

Түркістан облысы баспасөзінің қарашаңырағы саналатын «Оңтүстік Қазақстан» қоғамдық-саяси газетіне биыл 100 жыл!

Бір ғасыр бойы өңірдің шежіресін тасқа қашап басып келе жатқан басылымның мерейтойын атап өту басталып кетті. Соның жалғасы ретінде бүгін Түркістан қаласындағы «Конгресс Холл» кешенінде «Ескірмейтін естелік» фотокөрмесі ұйымдастырылды,- деп хабарлайды turkistan.today. 

Ашылу салтанатына Түркістан облысы әкімінің орынбасары Бейсен Тәжібаев, облыстың зиялы қауым өкілдері, қаламгерлер, журналистер мен фотограф мамандар қатысты.

– Қарашаңырақ басылымның ғасырлық мерейтойымен шын жүректен құттықтаймын. Бұл Түркістан өңірінің руханият саласындағы елеулі оқиға деп білемін. Тарихы өткен ғасырдан басталатын газеттің маңызы ерекше. Ғасырмен иықтасып тұрған «Оңтүстік Қазақстан» газетінің тарихы, беделінен бөлек, түрленген Түркістанның жылнамасының жазылуында өзіндік қолтаңбасы бар. Мен үшін де бұл мерекенің орны бөлек. Өйткені, журналисттік өмірімнің жемісті жылдары киелі шаңырақта қызмет етумен ұштасты. Ұлтымыздың біртуар арыстары қалам тербеген тарихи басылым бүгінде игі істердің, жетістіктер жаршысы болып келеді. Газеттің 100 жылдығы аясында ауқымды, тағылымы мол іс-шараларды көптеп өткізу жоспарланып отыр. Биыл осынау мереке аясында жыл көлемінде облыстық, республикалық деңгейде бірқатар іс-шараларды өткіземіз, – деді Бейсен Дәулетұлы.

Іс-шара барысында «Оңтүстік Қазақстан» облыстық қоғамдық-саяси газетінің Директор-бас редакторы Абай Балажан сөз сөйлеп, басылымның ғасырлық тарихына тоқталды. Бүгінгі фотокөрменің мән-маңызы жайлы әңгімеледі.

«Тұнба бастауын «Ақ жол» газетінен алатын бұл басылымды шығаруға Сұлтанбек Қожанов, Тұрар Рысқұлов, Міржақып Дулатұлы, Нәзір Төреқұлов секілді ұлт қайраткерлері атсалысып, халық мүддесін көздейтін мақалалары мен шығармаларын жариялап отырған. Одан беріде қазақ руханиятының сөзін сөйлеп, жоғын жоқтаған бұл газетте Мұхтар Әуезов, Жүсіпбек Арыстанов, Бейсенбай Кенжебаев сынды біртуар тұлғалардың қаламының табы қалған. Өткен ғасырдың елуінші-сексенінші жылдары аралығында да «Оңтүстік Қазақстан» газеті өз мұратынан айнымай, кеңестік цензураға қарамай салт-дәстүрімізді, тарихымызды, тілімізді, ділімізді кейінгі ұрпаққа жеткізу, руханиятымызды сақтап қалу жолында талмай қызмет етті. Газетке сол жылдары редакторлық жасаған, редакцияда қызмет еткен аға буын өкілдерінің барлығы осы жолда тер төгіп, ұлт үшін қызмет етті деп айта аламыз. Қазақстан тәуелсіздік алғаннан кейін де газет сол соқпақты әрі қарай жалғастырып, егемен еліміздің саяси тұрақтылығын сақтау, облыс экономикасы мен мәдениетін дамыту жолында маңызды рөл атқарып келеді» деді Абай Бекназарұлы.

Сондай-ақ Қ.А.Ясауи атындағы ХҚТУ профессоры, филология ғылымдарының докторы Сейдолла Садықов та ізгі тілегін арнады. Кеште айтыскер ақын Ахметрасул Баянбай арнау айтты. «Алқоңыр» этно-фольклорлық ансамблі өз өнерін көрсетіп, келушілерге көтеріңкі көңіл-күй сыйлады. Қатысушылар шежіреге толы көрмені тамашалап, ұйымдастырушыларға алғысын жеткізді.

Айта кетейік, фотокөрмеде аға басылымның әр жылдардағы тарихы фотосуреттер арқылы көрермен назарына ұсынылып отыр. Мұнда тек редакция ұжымының тарихы ғана емес, бүкіл оңтүстік өңірдің тарихында өзіндік орны бар тұлғаларды табуға болады. Сондай-ақ «Оңтүстік Қазақстан» газетінің фототілшісі Қайсар Шерімнің жеке шығармашылығынан алынған туындылар да қойылған. Көрме бір аптаға жалғасады деп жоспарланып отыр.

Түркістан облысы әкімінің баспасөз қызметі