Түркістандық делегация Ташкент облысындағы экотуристік нысандардың жұмысымен танысты

Түркістан Тамыз 2, 2023 0 612 Оқу тізіміне қосу

Түркістан облысының туристік әлеуетін насихаттау мақсатында құрылған ақпараттық топ Өзбекстандағы сапарын Бостандық ауданынан бастады, деп хабарлайды Turkistan Today.

«Open Turkistan» туристік ақпараттық орталығы ЖШС-нің директоры Серік Сандыбаев бастаған делегация құрамы таулы аймақтағы демалыс орындарының жұмысымен танысты. Түркістан облысының туристік операторлары Темірхан Назаров және Исмаил Омаралиев ақпараттық турға қатысуда.

Көршілес елдегі «Высота» жобасының жетекшісі, Қазақстандағы «Klad» туристік агенттігінің негізін қалаушы Евгений Малахов делегацияны қарсы алды. «Шарбақ» арнайы туристік аймағы, «Amirsoy Resort» курортында балалар туризмін дамыту жөнінде тәжірибе алмасу жүргізілді. Е.Малахов жеке қаржысы есебінен аталған аймақта «Высота» жас туристер үйірмесін құрған.

Балалар 14 күн бойы табиғат аясында демалып ғана қоймай, экстремалды спорттық-туризмнің негіздерін меңгереді. Атап айтқанда, жартасқа өрмелеу, таудағы қауіпсіздік, GPS бағдарлу, роликті коньки тебу, ағылшын тілінде логикалық дәрістер, экологиялық сауаттылық, ойындар мен шығармашылық іс-шараларына қатысады. Жас туристік үйірме бір ауысымда 38-50 балаға дейін қабылдайды.

Кездесуде осындай жобаны Түркістан облысында да қолға алу жайы талқыланды. Сондай-ақ таулы аймақтарда экстремалды парк және отбасыларға арналған демалыс орындарын ашу ұсыныстары айтылды. Мұнан соң, ақпараттық топ Beldirsoy, Chimgon туристік орындары мен Charvak су қоймасында болды.