FAIO 2026 финалына 16 елден 47 команда қатысты

Биыл үшінші рет ұйымдастырылған олимпиада өзінің қатысушылар саны бойынша рекордтық көрсеткішіне жетті. Алдын ала іріктеу кезеңінде 28 елден шамамен 1500 оқушы бақ сынаған. Финалға өткен командалар үш күн бойы машиналық оқыту, деректерді талдау және бағдарламалау бойынша күрделі тапсырмаларды орындады.

Сайыс бағдарламасы жасанды интеллект пен ақпараттық технологиялар саласындағы нақты міндеттерді қамтыды. Қатысушыларға ұсынылған есептер олардың теориялық дайындығымен қатар, мәселені талдау және нәтижелі шешім ұсыну қабілетін де бағалауға мүмкіндік берді.

Олимпиаданың бас серіктесі — activ брендімен жұмыс істейтін «Кселл» АҚ.

Компанияның корпоративтік байланыстар бөлімінің басшысы Байрам Азизовтың айтуынша, FAIO үш жылдың ішінде жергілікті жобадан халықаралық деңгейдегі таланттарды біріктіретін алаңға айналған.

«Осындай бастамаларды қолдау Қазақстанда және одан тыс жерлерде технологиялар мен цифрлық экономиканы дамытатын жаңа буын мамандарының қалыптасуына ықпал етеді», — деді ол.

FAIO олимпиадасының идея авторлары әрі бастамашылары — жасанды интеллект саласының сарапшылары Қуаныш Өтеу мен Әділхан Тоқтағанов. Жоба мектеп жасынан бастап технологияға қызығатын дарынды жастарды анықтап, олардың қабілеттерін дамытуға бағытталған.

Олимпиада тапсырмаларын AI саласындағы тәжірибелі мамандар мен зерттеушілер әзірлейді. Қатысушылардың жұмыстары шешімдердің тиімділігі мен алынған нәтижелердің сапасы негізінде бағаланады. Жоба инженерлік ойлауды, зерттеу дағдыларын және жаңа технологияларды меңгеруге деген қызығушылықты дамытуға мүмкіндік береді.