Әйелдер мен балаларды қорғау: жаңа ұсыныстар талқыланды

Жиынға мемлекеттік мекемелердің, халықаралық ұйымдардың, сарапшылар қауымдастығы мен азаматтық қоғам өкілдері қатысты. Қатысушылар әйелдер мен балалардың қауіпсіздігін күшейту, зорлық-зомбылықтың алдын алу шаралары және мемлекеттік саясатты жетілдіру мәселелерін кеңінен талқылады.

«16 күн зорлық-зомбылықсыз» акциясы жыл сайын 25 қараша мен 10 желтоқсан аралығында әлемнің 90-нан астам елінде өткізіледі. Оның мақсаты — қоғамда зорлық-зомбылық туралы түсінікті арттыру және нөлдік төзімділік мәдениетін қалыптастыру. Қазақстан бұл бастаманы тұрақты түрде қолдайды, ал Ұлттық комиссия ел бойынша атқарылатын жұмыстарды үйлестіріп, мемлекеттік және үкіметтік емес ұйымдардың күш-жігерін біріктіреді.

Дөңгелек үстелдің модераторы — Ұлттық комиссия төрағасының орынбасары, құқық қорғаушы әрі адвокат Айман Умарова. Спикерлер қатарында ҚР Конституциялық Кеңесінің төрайымы Эльвира Әзимова, БҰҰ-Әйелдер құрылымының Қазақстандағы өкілі Джерен Гювен Гюрэс және адам құқықтары жөніндегі уәкіл Артур Ластаев болды.

Жиында жетекші сарапшылар өз бағыттары бойынша баяндама жасады. Бас прокурордың орынбасары киберзорлықтың жаңа қауіптері мен прокуратура қабылдап жатқан шараларды түсіндірді. «One-Stop-Service» жобасының үйлестірушісі Ляззат Ракишева ұлттық комиссия бастамаларын іске асыру тәжірибесімен бөлісті. Әділет вице-министрі әйелдер мен балаларды қорғауға бағытталған заңнамалық өзгерістерді таныстырды. Сондай-ақ Зүлфия Байсақова дағдарыс орталықтарының маңызын, ерте көмек көрсетудің тиімділігін атап өтті. Елена Тарасенко мемлекет, ҮЕҰ және халықаралық ұйымдардың 1325 резолюциясы аясындағы ынтымақтастығын түсіндірсе, заң ғылымдарының докторы Марат Қоғамов қылмыстық процестегі әйелдердің рөліне тоқталды. Баян Жандосова зорлық құрбандарын қалпына келтіру тәжірибесін ұсынды.

Талқылауда репродуктивті денсаулықты қорғау, әйелдердің экономикалық мүмкіндіктерін кеңейту, әкелерді профилактикалық жұмысқа тарту және қауіпсіздікті арттыратын цифрлық платформаларды дамыту мәселелері ерекше назарға алынды. Сонымен бірге ведомстволар арасындағы үйлесімді әрекеттестікті күшейту және азаматтық сектормен серіктестікті нығайту қажеттігі айтылды.

Ұлттық комиссия өкілдері зорлық-зомбылыққа нөлдік төзімділік мәдениетін қалыптастыру — ұзақ мерзімді әрі жүйелі жұмысты талап ететінін атап өтті. Бұл бағытта құқықтық сауаттылықты арттыру және мемлекеттік органдар мен ҮЕҰ-ның күш біріктіруі үлкен рөл атқарады.

Іс-шара соңында әйелдер мен балаларды қорғау саласындағы белсенді еңбектері үшін қатысушыларға алғыс хаттар табысталды.