100 мыңнан астам адам жиналған мереке: Екібастұзда Теміржолшылар күні кең көлемде аталып өтті

Екібастұз қаласының орталық алаңы Теміржол көлігі қызметкерлері күніне арналған ең ауқымды мерекелердің біріне айналды. RWS KZ холдингі мен қала әкімдігінің қолдауымен өткен шараға Павлодар, Астана, Қарағанды, Семей, Өскемен және өзге де өңірлерден мыңдаған қонақ келді.

Мерекенің ресми бөлімінде теміржол саласының дамуына үлес қосып жүрген қызметкерлер марапатталды. Ұзақ жылдар бойы еңбек еткен мамандарға арнайы сый-құрмет көрсетіліп, бірнеше буыннан тұратын еңбек әулеттеріне «RWS KZ күміс жұлдызы» табысталды. Компания мұндай дәстүр арқылы еңбек сабақтастығын дәріптеуді көздейді.

RWS KZ холдингінің бас директоры Сергей Павлингер компанияның өндірістік даму қарқыны туралы айтып, теміржол холдингін қалыптастыруға бір триллион теңгеден астам инвестиция бағытталғанын мәлімдеді. Қазіргі таңда кәсіпорындар теміржол саласына арналған 137 түрлі өнім шығарып, оның басым бөлігін экспортқа жөнелтіп келеді.

Іс-шара Екібастұзбен ғана шектелген жоқ. Петропавл қаласымен тікелей байланыс орнатылып, онда «RWS дауысы» корпоративтік байқауының финалы өтті. Сонымен қатар Солтүстік Қазақстан облысында Наzима мен жүргізуші Олжас Рымбаевтың қатысуымен мерекелік концерт ұйымдастырылды.

Көпшіліктің ерекше қызығушылығын тудырған сәттердің бірі – компания қызметкерлеріне арналған корпоративтік лотерея болды. Жеңімпаздарға 500 мың және 1 миллион теңгелік сертификаттар табысталып, бас жүлде – автокөлік Петропавлдағы RWS Wagon кәсіпорнының қызметкеріне бұйырды.

Кешкі концертте алдымен «Ирина Кайратовна» тобы өнер көрсетсе, кейін сахнаға Сергей Жуков пен «Руки вверх» тобы шықты. Сонымен қатар көрермендер үшін Бауыржан Исаев ән орындап, мерекелік көңіл күйді «Астана» КТК командасының әзілкештері толықтырды. Кеш соңында жүз мыңнан астам адам Қазақстан Республикасының Мемлекеттік Әнұранын бірге орындады.

RWS KZ бүгінде өндірісті ғана емес, әлеуметтік инфрақұрылымды да дамытуға басымдық беріп отыр. Компания электр болат балқыту кешені мен ыстықтай брикеттелген темір өндіретін жаңа зауыт салу жобаларын жүзеге асыруда. Бұл бастамалар нәтижесінде үш мыңнан астам жаңа жұмыс орны ашылады деп жоспарланған.

Сонымен қатар қызметкерлер үшін корпоративтік тұрғын үй бағдарламасы, оқу орталығы және спорт кешені жұмыс істейді. Алдағы уақытта тұрғын үй кешені, қонақүй, балабақша мен техникалық колледж салу көзделіп отыр.

Осылайша, Теміржолшылар күні Екібастұз үшін кәсіби мерекеден әлдеқайда ауқымды мәнге ие болды. Бұл шара еңбек адамдарына құрмет көрсетіп қана қоймай, қаланың өндірістік әлеуеті мен әлеуметтік дамуының жаңа кезеңін айқындайтын маңызды оқиға ретінде есте қалды.