Түлкібас ауданында алтын құрсақты аналарға құрмет көрсетілді

Бұл марапаттар – аналардың бала тәрбиесіндегі рөлін дәріптеп, қоғамдағы беделін арттыруға бағытталған. Іс-шараға қатысқан аудан әкімінің орынбасары Ербол Орманов марапат иелеріне жылы лебізін білдіріп, олардың демографиялық өсімге қосып отырған үлесін ерекше атап өтті.

«Алтын алқа» – жеті және одан да көп бала туып, тәрбиелеген аналарға, ал «Күміс алқа» – алты баласы бар аналарға беріледі. Бұл марапаттарды тек Қазақстан азаматтары иелене алады. Мемлекет тарапынан көрсетілетін бұл құрмет аналардың еңбегін бағалаумен қатар, отбасылық құндылықтарды дәріптеуді мақсат етеді.

Түлкібас ауданында бүгінде 1220 ана – «Алтын алқа», 2999 ана – «Күміс алқа» иегері, сондай-ақ 355 ана І және ІІ дәрежелі «Ана даңқы» орденімен марапатталған. Бұл көрсеткіш жыл сайын артып келеді, бұл – өңірдегі отбасы институтының мықтылығын көрсетеді. Ал Түркістан облысы бойынша 177 мыңнан астам көпбалалы ана бар, оның ішінде 15 мыңнан астамы «Алтын алқа», 43 мыңнан астамы «Күміс алқа» иегері.

Бұл марапаттардың тарихы 1993 жылдан бастау алады. Алғашқы жылдары ол сегіз және одан да көп баласы бар аналарға ғана берілсе, 2010 жылдан бастап талаптар жеңілдетіліп, жеті және алты баласы бар аналар да құрметке ие бола бастады. Қазақстанда бұл марапаттар аналардың қоғамдағы ерекше орнын айқындайтын жоғары мәртебелі ордендер қатарына жатады.

Түлкібаста өткен салтанатты шара – аналардың қоғамдағы орны мен еңбегін айшықтап, отбасы құндылықтарын дәріптеген маңызды оқиға болды. Алтын құрсақты аналар – ұрпақ тәрбиесінің, ұлт болашағының негізін қалаушы тұлғалар.