«Тазалықшы боп, 10 есе көп табамын». Қазақстандық әйел 3 баласын елге тастап, Германияға кеткен

3 баласын елде тастап, Германияға табыс табуға кеткен келіншек әлеуметтік желіде өз оқиғасын айтып берді. Ол мәжбүрліктен шетелге кетіп, елде қалған балалары үшін ауыр жұмыс істеп жүргенін айтты, деп Turkistan Today хабарлайды El.kz ақпарат агенттігіне сілтеме жасап.

Бұл мақтаныш емес. Дәл мына жүрісім мақтаныш емес. Мен демалып, қыдырып жүргенімді көрсетіп жатқан жоқпын. Міне, қолымыз күс-күс болып, демалыс күні де тазалаймыз. Неге осындай қара жұмысты елде істесек те жағдайымыз жақсармайды? Әттеген-ай. 3 бала елде, жаным, жүрегім тыныш емес. Ұйқым тыныш емес, - деп ағынан жарылды.

Тазалықшы боп жүрген келіншектің екі дипломы бар болып шықты.

Екі дипломым бар, жоғары білім алған қызбын. Бірақ, мен 2019 жылға дейін мүгедек жандармен жұмыс істедім, көптеген құйтырқы әрекеттерге куә болдым. Ол жақта да жарымжан жандардың құқығын қорғаймын деп талай кедергіге тап болдым. "Әділдік жоқ екен ғой" деп шетел асып кеттім. Қазір балаларым кішкентай, аяққа тұрып алсам, елге барып қызметімді істеймін, - деді қазақ келіншек.

Германияда жүріп, елдегі ең төменгі жалақыдан 10 есе көп табатынын да жасырмады.

Бұл елдің азаматы болмаған соң ешқандай құқығымыз жоқ. Сол үшін қолымыз күс-күс болып, қара жұмыс істеп жүрміз. Иә, сіздер алып жатқан 80 мың айлықтың 10-15 есе жоғары алып жатырмыз. Адал еңбегіміздің бағаланып жатқанына да шүкір. Жексенбі күні 2 сағат тазалықшы боп, 50 мың теңге табамын. Оны сіздер Қазақстанда жарты айда табасыздар, дұрыс па? Мен Қазақстанды жақсы көремін. Сіздердің де жағдайларыңыз жақсарса екен деймін, - дейді ол.