Жұмабек Кенжалиннің 70 жылдығына арналған халықарылық конференция өтті

Конференцияға мемлекет және қоғам қайраткерлері, белгілі журналистер Сауытбек Абдрахманов, Жанболат Аупбаев, Талғат Айтбайұлы, Өмірхан Әбдиманұлы, Аяған Сандыбай, Бекболат Жетпісбайұлы, Сәбит Дүйсенбиев, Серік Әбікенұлы, техника ғылымдарының докторы Бақдәулет Құмаров, саясаттану ғылымдарының докторы, профессор Жомарт Симтиков, философия ғылымдарының докторы Дәуренбек Құсайынов пен басқа да азаматтар қатысты. Журналистика факультетінің деканы Қанат Әуесбай модераторлық жасап, кіріспе сөзінде барлық қатысушыларды игішараның басталуымен құттықтап, осынау іс-шараның маңызы өте жоғары екенін айтты. Парламент Сенатының төрағасы Мәулен Әшімбаевтың, әл-Фараби атындағы ҚазҰУ ректоры Жансейіт Түймебаевтың ізгі лебізге толы құттықтау хаттарын оқыды. 

Конференцияға қатысқан «Ақиқат» ұлттық қоғамдық-саяси журналының бас редакторы Дәуіржан Төлебаевтың айтуынша, толғаулы пікірлерін, жүрекжарды лебіздерін ортаға салған тұлғалардың әрқайсысы Жұмабек Омарұлының  қадір-қасиетіне, азаматтық қырларына тоқталды.

– Белгілі қоғам қайраткері, жазушы-публицист Сауытбек Абдрахманов Жұмабек Омарұлының кіршіксіз таза болмысынан, журналистік қызметінен тартып, «Қазақ газеттері» акционерлік қоғамын сақтап қалудағы еңбегімен сабақтай келіп, қарымды қаламгердің әр қыры бірте-бірте зерттеліп ашыла беруі тиіс екенін айтса, белгілі қаламгер Жанболат Аупбаев ардақты азаматпен бірге жұмыс істеген жарқын жылдарды еске алып, талантты да табанды журналист, білімді де білікті басшы, өмірінің соңғы сәтіне дейін жүрдек уақыт жүрісіне лайық жұмыс машығынан танбаған қажыр-қайрат иесі ретіндегі қасиеттеріне назар аударды. Филология ғылымының докторы Өмірхан Әбдиманұлы қайраткер тұлға көтерілген биіктіктің бәрі де таза еңбегімен, әділ жүріп, жақсылықтың жанашыры бола білуінің арқасында жеткен жетістіктер нәтижесі екенін тілге тиек етті, – деді Дәуіржан Жұмажанұлы. 

Алқалы жиында, сондай-ақ көрнекті публицист Қайнар Олжай, Талғат Айтбайұлы, «Қазақ газеттері» ЖШС-і бас директорының орынбасары – Алматы басылымдарының жетекшісі Серік Әбікенұлы мен басқа да азаматтар сөз сөйледі. «Атамұра» корпорациясының президенті Рахымғали Құл-Мұхаммед журналистика майталманының 70 жылдығына арнап автордың «Ұлт рухын ұлықтаған ұрпақпыз» еңбегін үш мың данамен шығаруға бастамашылық жасағанын айтып, аталған кітаптың құндылығы жөнінде ой өрбітті. ІІІ Жұмабек Кенжалин оқулары аясында қос бірдей кітаптың, атап айтқанда «Өнегелі өмір» сериясымен жарық көрген «Жұмабек Кенжалин» деп аталатын ғұмырнамалық жинақтың, сондай-ақ Ж.Кенжалиннің «Ұлт рухын ұлықтаған ұрпақпыз» атты туындысының тұсауы кесіліп, оқырман қауымға жол тартты.

– Іс-шара аяқталған соң конференция қатысушылары Панфилов көшесінде орналасқан 101 үйді бетке алды. 1985-2009 жылдар аралығында Жұмабек Кенжалин тұрған бұл көп қабатты еңселі үйдің қабырғасына орнатылған ескерткіш тақтаның ашылу рәсімі жасалды. Бұдан соң көсемсөз шеберінің рухына арнап ас беріліп, құран бағышталды. Аста да талай игі жақсылар өз естеліктерімен бөлісті. Ардақты тұлғаның зайыбы Әлима Әбдірахманқызы, қаламгердің ұлдары Дастан мен Жандос Кенжалиндер қолдау көрсетіп келген барша жанашыр азаматтарға әулет атынаналғысын жеткізді, – деп атап өтті Дәуіржан Жұмажанұлы.