Жалақысы жоғары жандар 4 пайыздық автонесие ала алмайды

Автонесие беру бағдарламасына өзгерістер енгізу мәселесі қарастырылып жатыр. Бұл туралы Индустрия және инфрақұрылымдық даму министрі Марат Қарабаев хабарлады.

Қазір бұл бағдарлама бойынша бірнеше мәселе бар екенін атап өтті министр, деп хабарлайды Turkistan Today.

«Біріншіден, біз әр айда қайтарылған қаржы есебінен қосымша автонесиені жүзеге асырамыз дедік. Бірақ айына шамамен 1 млрд теңге қайтарылып отыр. Ол 100 көлікке жетеді. Осы уақытқа дейін шамамен 4 млрд теңге қайтарылды. Ол ең көп дегенде 400 көлікке жетеді. Бағдарлама жарияланғанда шамамен 5 млрд теңге қайтарылған соң, қайта басталуы керек», – деді министр Үкімет отырысынан кейін.
Сондай-ақ министр автонесие бағдарламасына алғашқы жарна енгізу мәселесі де қаралатынын да айтты.

«Екіншіден, бұрын бастапқы жарна болмайтын. Ол бойынша 10% бастапқы жарнаны енгізуді қарастырып отырмыз. Үшіншіден, көліктің құны 15 млн болса, 10 млн теңге несие берілетін. Оны да төмендетуді әрі көбірек көлік беруді қарастырамыз», – деді Қарабаев.
Сонымен қатар белгілі бір жалақысы бар адамдарға шектеу енгізу көзделіп отыр. Белгіленген шекті жалақыдан асып кетсе, көлік ала алмайды.
«Осылайша, мұқтаж жандарға арнап жасаймыз. Осыған дейін көлік алған адамдардың орташа жалақасына қарап белгілейміз. Қазір қанша екенін айта алмаймын. Осы өзгерістерді бір айда енгізіп, аяқтауды көздейміз», – деді Марат Қарабаев.
Еске сала кетсек, елімізде жеңілдетілген автонесиелеу бағдарламасы былтырдан басталды. Бағдарламаға бөлінген қаржы таусылғандықтан, банктер өтініш қабылдауды уақытша тоқтатқан болатын. 

Министрдің айтуынша 4 пайыздық автонесие туралы жаңа талаптар 15 мамырға дейін жарияланады. Және де автокредит алған адамдардың аты-жөні жариялануы мүмкіндігін айтты.