Қазақстан сапалы стоматологиялық қызметтер арқылы медициналық туристерді тартуда

Қатысушылар ауыз қуысы ауруларын диагностикалау мен емдеуде инновациялық технологияларды қолдану, клиникалық практиканың түрлі аспектілері, күрделі жағдайларда жасалатын хирургиялық араласулар мен профилактика шараларының заманауи тәсілдерін талқылады.

Жиынның ашылуында ҚР Денсаулық сақтау министрі Ақмарал Әлназарова құттықтау сөз сөйледі. Ол стоматологияның қоғамдық денсаулықты қалыптастырудағы маңызды рөлін атап өтті.

«Стоматологиялық мәртебе – ағзаның жалпы жағдайының негізгі көрсеткіштерінің бірі болып табылады және соматологиялық сырқаттанушылықты азайтуға бағытталған шаралар жүйесін әзірлеу – ұлт денсаулығын жақсарту бағдарламаларының ажырамас бөлігі болып табылады», – деп атап өтті ведомство басшысы.

Министр барлық стоматолог дәрігерлерді, ең алдымен, профилактикалық шаралар арқылы ауру деңгейін төмендету үшін күш біріктіруге шақырды.

Өткен жылдан бастап республикада мектеп жасындағы балалардың арасында стоматологиялық аурулардың жүйелі профилактикасына бағытталған бағдарлама іске қосылды. Мақсаты – ерте кезеңде ауруларды анықтау және динамикалық бақылау арқылы стоматологиялық аурулардың таралуын 10%-ға азайту, сонымен қатар, балалар үшін стоматологиялық көмектің қолжетімділігін 80%-ға дейін арттыру.

Қазақстанда стоматология – шетелдің алыс-жақын елдерінен медициналық туристерді тартатын ең қарқынды дамып жатқан медициналық салалардың бірі.

Бүгінде Қазақстанға тіс емдеу, пародонт тіндерін қалпына келтіру, денталдық имплантаттау және протездеу үшін АҚШ, Германия, Иран, Ресей және ТМД елдері сияқты 37 елдің азаматтары келуде, бұл – еліміздегі стоматологиялық көмектің жоғары сапасының айқын дәлелі.