Түркістан облысының тұрғындарының өзекті мәселелері шешімін табуда

Жеке қабылдауға Қазығұрт, Ордабасы, Сауран, Түлкібас аудандары мен Түркістан қаласынан келген тұрғындар жайылымдық жер, ағын су, ауыл шаруашылығына қатысты мәселелерді көтерді. Мәселен, Қазығұрт ауданының азаматтары жайылымдық жер көлемін кеңейту және инфрақұрылым жүйелерін жүргізуге қатысты мәселе көтеріп, ұсыныстарын жеткізді. Ордабасылық шаруалар Бөген ауыл округіндегі су ұңғымаларын іске қосу жайын қозғап, сонымен қатар ашық дренаждарға бақылау жасау мүмкіндігін қарастыруды сұрады. Түркістан қаласының тұрғыны жерге қатысты сот шешімінің орындалуына қатысты шағымымен келді. Ал, Сауран ауданынан келген азамат игерілмей жатқан жерлерді мемлекет меншігіне қайтаруды сұраса, түлкібастық азаматтар жайылымдық жер қажеттілігі мен өндірістік аймақта ауыл шаруашылығы өнімдерін қайта өңдейтін өндірістер ашу мәселесімен жүгінді. 

Нұрбол Тұрашбеков Қазығұрт ауданы әкімінің орынбасарына жұмысшы топпен жайылымдық жерлерге мониторинг жүргізіп, заң аясында тиісті шараларды қабылдауды тапсырды. Ордабасы ауданындағы су ұңғымалары мен ашық дренаждардың жағдайын облыс әкімінің орынбасары өзі арнайы барып көріп, мамандармен зерделейтінін айтты. Сауран мен Түлкібас ауданына қатысты көтерілген мәселелер мамандар тарапынан тексеріліп, заң аясында шешу жолдарын қарастыру келісілді. Түркістандық азаматтың мәселесі бойынша қала әкімінің орынбасарына заңға сәйкес талдап, мүмкіндіктерін саралауды жүктеді.